Авто замын салбарын “Үзэсгэлэн болгогч” усан туулай жилийн золголт 2023 оны 02 дугаар сар 27-ны өдөр Корпорейт зочид буудлын “Event hall” танхимд морин цагт эхэллээ.
Арга хэмжээг Зам тээврийн хөгжлийн яамны дэд сайд Л.Халтар, Монголын авто замчдын холбооны ерөнхийлөгч Т.Бямбаа, Монголын авто замын ахмадын хороон дарга, МУ-ын гавьяат барилгачин Р.Буд нар нээж авто замын салбарынхандаа сар шинийн мэнд дэвшүүллээ. Мөн Монгол Улсын их хурлын гишүүн, Зам тээврийн хөгжлийн сайд С.Бямбацогт нийт замчиддаа сар шинийн мэнд дамжуулсныг та бүхэндээ уламжилж байна.
Авто замын салбарын золголтоор ажил үйлсээрээ тэргүүлсэн ажилтан албан хаагчдад төрийн дээд одон медалиар шагнагдсаныг Зам тээврийн хөгжлийн яамны дэд сайд Л.Халтар, Монголын авто замчдын холбооны ерөнхийлөгч Т.Бямбаа нар гардууллаа.
“Хөдөлмөрийн гавьяаны улаан тугын одон”- оор “Дайргант” ХХК-ийн зөвлөх инженер Х.Пүрэвдорж, “Алтан гадас одон”- оор ахмад замчин Ж.Амгалан, “Тэмүүн холдинг” ХХК-ийн нягтлан бодогч З.Сэргэлэн, “Хөдөлмөрийн хүндэт медаль”-аар “Тэмүүн холдинг” ХХК-ийн авто замын инженер Г.Хишигбат , Хүнд машин механизмын оператор Ш.Арсланбаяр нар шагнагдсан байна.
Авто замын салбарын золголтод хүрэлцэн ирсэн хүндэт зочдодоо морин хуурын аялгуу эгшиг, ардын дуугаар ая дууны цэнхэр хадаг өргөн барив.
Тус арга хэмжээг “Замын битум” ХХК, “Билэгт зам” ХХК, “Баткүбик” ХХК ивээн тэтгэн, “Заабар” ХХК-ийн захирал З.Батбаяр Булганы сайхан айраг илгээж, “Брос проперти” ХХК ая дууны мэндчилгээгээр авто замын золголтод оролцлоо. Ивээн тэтгэсэн дээрх компаниуддаа нийт замчдынхаа өмнөөс талархал илэрхийлж алтан шар замын хишиг буян нь үргэлж мөнхөд ивээж байхыг хүсэн ерөөе.
Ахмад буурлуудынхаа тохойг түшин амар мэндийг нь асууж ерөөсөн Авто замчдын золголт өргөн дэлгэр боллоо. Ирж буй Туулай жилдээ Авто замчид та бүхний ажил үйлс өөдрөг байхын өлзийтэй ерөөлийг өргөн дэвшүүлье.
